??: لحقني دكتور أخي إلو فترة عم يتصرف تصرفات غريبة..
??⚕️: تصرفات متل شو وقديش إلها معو هالحالة؟
??: إلها سنة تقريباً بس زايدة كتير هالفترة..بيضل بيقلنا أنتو مجانين.. وبيخربط بالكلام وأنو هو إجا من المريخ ووصل عالأرض بالصدفة وحاولوا يقتلوه…بيشوف أشباح وبيحس بطعمة غريبة بالمي.. بس يمرض مابيعترف بهالشي وما بيرضى يروح عالدكتور وبيرفض يشرب أي دوا لأن بيفكرو سم☹️
??⚕️: يا آنسة أخوكي بيعاني من مرض اسمو #الفصام.
??: فصام? يعني أخي عندو شخصيتين وحدة منيحة والتانية شريرة؟ ?
??⚕️: اهدي وماتخافي واسمعيني شو بدي قول..
الفصام هو اضطراب ذُهاني(عقلي) شديد بيتميز بشغلتين:
1_اضطراب في التفكير (توهّمات)
2_اضطراب في الإدراك (إهلاسات)
وأبداً مانو انقسام بالشخصية أو أنو المريض عندو شخصيتين???
??: طيب دكتور شو أسباب المرض؟
??⚕️: السبب الرئيسي لساتو غامض بس في بعض الأسباب أثبتو صحتها بالمرض:
?العوامل الوراثية: هي الشرط اللازم ولكن غير الكافي للمرض يعني الاستعداد الوراثي بيورث الاستعداد للمرض?
?العوامل الكيميائية الحيوية: هون عنا كذا نظرية….
إما زيادة الدوبامين⬆️ أو نقص الغلوتامات⬇️ أو زيادة السيروتونين⬆️ أو نقص الغابا⬇️
⚫وكمان أكتر من90% من مرضى الفصام مدخنين?
⚫والأشخاص المصابين غالباً بيكونو من مواليد الشتاء أو أوائل الربيع لانو إحدى النظريات لحصوله هو الآلية الخمجية⬅️ وبفصل الشتاء وأول الربيع بتكتر الاصابة بالفيروسات متل الانفلونزا.
??: وكيف منشخص المرض؟
??⚕️: رح قلك معايير تشخيص الفصام..(هنن غليظين شوي?)… لازم يتواجد تنين أو أكتر مما يلي كل يوم وخلال أغلب اليوم لمدة شهر:
?أوهام
?هلاوس
?كلام غير منتظم
?سلوك غير منتظم
?أعراض سلبية (يعني نقص التعبير العاطفي أو فقد الإرادة).
ولازم يتواجد خلل في مجالات الأداء الأساسية متل العمل أو العلاقات الشخصية ولازم تستمر علامات الاضطراب {6} شهور على الأقل.
ولهلا مافي إجراءات تشخيصيّة خاصة بتأكد المرض وبيتم الاعتماد على وجود أعراض سريرية بتحقق المعايير يلي فوق⬆️.. ومشان أنفي الإصابات العضوية ممكن أعمل رنين مغناطيسي او طبقي محوري للدماغ?.
??: طيب شو العلاج؟
??⚕️: لازم نهتم بالحالة النفسية للمريض ونشجعو ونشرح لأهلو طبيعة مرضو المزمنة ونشجعن يدعموه نفسياً ويتحملوه…?
وكمان ممكن نستخدم المعالجة بالتخليج الكهربائي(شغلة معتة شو بدكن فيها?) بس طبعاً هوي علاج مؤقت الهدف منو نحسن درجة الاستجابة وبتضل المعالجة الدوائية ?هي الأساس على المدى الطويل ويلي اسما مضادات الذهان أو المهدئات الكبرى متل الكلوروبرومازبن _ ريسبيريدون_ كلوزابين_ اولانزيبين وغيرا…
??: شكرا كتير دكتور.. بس ضل شغلة مافهمت شو يعني توهّمات وإهلاسات؟
??⚕️: رح اشرحلك معناتن و قلك أخوكي شو بيعاني منن..
التوهّم هو اعتقاد خاطئ بيآمن فيه المريض وغير قابل للإقناع أو المناقشة ومابيتّفق مع ثقافة المريض أو المعتقدات الشائعة في المجتمع.. وإلو كتير أنواع …وأخوكي مثلاً لما قال انو إجا من المريخ ⬅️ عندو توهم غريب
ووقت حاولو يقتلوه⬅️ توهم اضطهادي
أما الإهلاسات هي إدراك خاطئ حسي لشيء غير حقيقي وغير موجود ويقتنع فيها المريض قناعة تامة..
فوقت أخوكي شاف أشباح ⬅️ عندو إهلاسات بصرية
ولما حسّ بطعم غريب⬅️ إهلاسات ذوقية
??: شكراً كتير دكتور عذبناك معنا ❤️.
كُنت معكم وفاء كنجو?
المصدر:
1️⃣ https://www.mayoclinic.org/diseases-conditions/schizophrenia/symptoms-causes/syc-20354443
2️⃣ مقرر الطب النفسي في كلية الطب البشري جامعة دمشق.
