ماما ❤️
?? بلشت قلك هالكلمة من لحظة يلي بديت حياتي جوّاتك من لحظة يلي قرر الرب فيها أني أخلق وأني كون من رحمك منك.. منك وفيكِ ❤️
?? ما فيي أحصر حياتي جوّاتك بال٩ شهور.. قبل حملك فيي وبعد ولهلق أنا عايش جوّاتك ومن صلبك تكوّنت ❤️
?? بهاليوم الكريم يومك ويوم كل أم حملت وتعبت وربّت وقدمت وبأوقات فدت طفلها بروحها وماتت لتعطيه الحياة ولأنو حقك عليي متل ما اهتميتي فيي اهتم فيكِ فاسمعيني وساوي يلي رح قلك عليه لتكوني ماما بصحة وبعافية لأقدر اجي أنا بصحة وعافية وقلك أمييي ❤️
?? لازم تبلشي مشوار حملك فيي مع طبيبك ولازم يكون الطبيب ثابت يعني فيي قلك هاد رفيقي ورفيقي الوفي اللي خايف عليكِ وعليي وبيعرف وحدو مصلحتنا ?
أول زيارة الو لازم بس صار عمر الحمل شهرين وقتها هوي بيصير يحسب ويضرب ويطرح ويجمع ليعرف موعد اللقاء ولازم يا ماما تساعديه بأنك تعرفي تاريخ آخر دورة اجيتك.. الإيكو هون ما بينفع متل بعد.. بس دفتر تسجيل تواريخ دوراتك بتنفع ❤️
بعدها رح تكون مواعيد زياراتنا الو كالتالي :
كل شهرين حتى الشهر السابع.. بعدها كل أسبوعين من السابع للتاسع.. بعدها مرة وحدة بالأسبوع حتى أجي أنا.. هدول المواعيد الطبيعية إن كان الوضع الصحي الك والي طبيعي وسليم ❤️
بكل زيارة رفيقنا الدكتور رح يقيس وزنك، ضغطك ويناغشني شوي ليشوف حركتي ببطنك، نبضات قلبي يلي عم تصرخ اسمك ويلي بتبلش هي بالتلت التاني من الحمل يعني بعد الشهر التالت يا قلبي ❤️
رح يقيس بيتي الجميل بطونك ورح يعمل اختباراتو المعتادة دم وبول وعنق رحم وإيكو..هاد شغلو الله يعطيه العافية ?
?? بالنسبة لحبيب قلبي وقلبك وقلب السامعين الكرش العزيز بحب خبرك يا ماما أنو معدتك بطلت سنغل.. صارت مرتبطة فيي وصرنا تنين سوا سوا.. لهيك صرنا بحاجة أكل أكتر بالضبط بالضبط صرتي بحاجة تزيدي ٣٠٠ سعرة حرارية على سعراتك اللي محتاجتيها.. وهاد بيعني ما تطلعي بصينيتي البيتزا وتقليلو لبابا هاد حاجيات البيبي ? هوي زيدي قطعة على حاجياتك السابقة بكفي بس إذا منشان تتغنجي تغنجي وحدك بحقلك وخاصةً بالبيتزا بلا علم بلا طب ?
لازم تاكلي أكل صحي يعني لحوم بلا دهن، فواكه، خضرا، لبن قليل الدسم ولا تنسي أنك بحاجة شديدة للكالسيوم، الحديد، وحمض الفوليك.
الكالسيوم بتاخديه من اللبن، الحليب، عصير البرتقال، اللفت، السبانخ، اللوز، الفاصوليا.
الحديد من اللحم الأحمر، السمك، البيض، الفواكه المجففة.
مهم تاخدي حمض فوليك قبل شهر وخلال أول ٣ شهور من الحمل منشان كون سليم عصبياً.. ولازم نبهك يا ماما أنو هالفيتامينات والمكملات بتاخديهن من الأكل ومن الدوا بوصفة طبيبك ومراقبتو وما تاخديهن وتبطلي أكل أوعك.. هنن والأكل الصحي المتوازن سوا ❤️
?? لازم تبقيّ مي كتير ? حضرتي بعطش كتير ? لا عم أمزح بس مهمة السوائل حتى ما يصير معك تجفاف أو إمساك.
?? يلا قومي تنشطي وعمليلك رياضة.. شمال يمين شمال يمين.. مشي، سباحة و يوغا لكن كمان بعلم الدكتور وكل أسبوع حوالي الساعتين ونص متفرقات هيك ينصح.. وخلي وقت الرياضة في فترات راحة وشرب سوائل.. مو حلوة التنبلة مامي لا تعوديني عليها ?❤️
?? منشان النومة بعرف أني حصير تقيل عليكِ وبكتير أوقات رح أحرمك النوم والراحة ولا رح تعرفي عأي جنب تنامي وترتاحي لكن الطب بينصحك تنامي على جنبك اليسار وركبك مطوية.. هالشي بيريح قلبك ليبعتلي دم ويريحني وبهالوضعية بخف ضغطي على جسمك الطري وبخف خطر يصير معك دوالي وبواسير ❤️
?? بعدي عن الكافئين مو كتير منيح الك والي وكمان عن الكحول والدخان والأهم بعدي عن الزعل، بعدي عن التعب، خليكِ بخير لكون أنا بخير ❤️
خليكِ ماما الحنونة ❤️ نعمة الله الدافية العظيمة يلي بحضن قلبها ورحمها بتمنحني الحياة حياة..
خليكِ ماما يلي من أول ما يقرر الرب يخلقني فيها وهيي بتتعذب بتتوجع بتتحمل بتصبر وكل مرة بتقول خلص تعبت هي آخر مرة.. وبترجع لتخلق روح جديدة وتمنحها حبها وحنيتها.. وحدك يلي بتعلمينا كيف نخلق من رحم ألمنا أمل.. وحدك بتوهبينا العاطفة الإحساس وبتخلينا إنسان ❤️
فيكِ سر تكويننا.. فيكِ نحنا مهما كبرنا قدامك صغار..
مهما عظمنا قدام ضعاف..
بحبك وكل عام وأنتِ كل الدني ❤️
كنت معكم #
❤️
المصدر :
https://kidshealth.org/en/parents/preg-health.html
