??: مرحبا دكتور… مابعرف كيف بدي احكيلك ? بس بنتي بيتغير مزاجا بسرعة وبتعصب كتير ومابتعود تسيطر على حالا… و أوقات بتصير تاكل كتير أكتر من العادة… ومرة كانت بدا تنتحر بس الحمدلله كنا موجودين وماخليناها.. لهيك أنا اجيت لعندك لأنو هالشي كتير خوفني?
??⚕️: أهلا وسهلا مدام… ممكن تقليلي من ايمت صاير معا هالشي؟
??: والله يادكتور من وقت كانت مراهقة وحاسستا هيك صايرة.. وكنت فكر عادي أنو بهالسنّ كل البنات بيتغيروا هيك.. بس وقت وصلت الشغلة لتحاول تنتحر كتير خفت ودغري اجيت لعندك.. حتى هي قلتلا تجي معي بس عصّبت ومارضت أبداً ?
??⚕️: اهدي شوي مدام وماتخافي… بنتك غالباً عندا شي منسميه #اضطراب_الشخصيّة_الحديّة #Borderline_Personality_Disorder واختصاراً BPD
??: حديّة!! شو يعني هي مابتاكل حدّ كتير ?
??⚕️: لا يا مدام مو هيك قصدي ?.. رح اشرحلك معناها بشكل كتير بسيط..
?اضطراب الشخصية الحديّة فينا نعتبرو على الحد بين الطبيعي وغير الطبيعي…
?وبتعرفي أنو نسبة انتشارو حوالي (2_3%) فهو شائع أكتر من الفصام
?وأنو بيصيب النساء أكتر من الرجال بنسبة الضعف…
? وعفكرة في كتير مشاهير كانو يعانو من هالمرض متل مثلاً الأميرة ديانا ?
??:عنجد دكتور ؟؟ طيب أعراض بنتي ممكن يعني تكون هيك!
??⚕️:هيدا الاضطراب غالباً بيبدأ بفترة المراهقة وبيكمّل مع الشخص…فإذا كانت البيئة يلي عايش فيها مثالية ومافي ضغوطات.. مارح تظهر عليه أعراض ولكن وقت بينحط بظروف ضاغطة وتوتر.. بتبلش تظهر مجموعة من الأعراض عندو منها:
1️⃣ المزاج المتقلب بسرعة والغير مستقر: يعني ممكن يكون الشخص مبسوط وفجأة يصير زعلان☹️
2️⃣ الشعور بالفراغ الداخلي: يعني متل أنو ماالو هدف بالحياة وماعد في شي بيهمو أو يعنيه
3️⃣ نوبات غضب مفاجئة وغير مبررة مع صعوبة التحكّم بالنفس
4️⃣ تصرّفات اندفاعية: متل شرب كمية كبيرة من الكحول أو تعاطي المخدّرات اؤ اضطرابات بالطعام متل ماصار مع بنتك
5️⃣ علاقات غير مستقرّة
6️⃣ الخوف من الفقد: وحتى بأبسط التفاصيل متل إذا شخص تأخر عالبيت مثلا ⏪ وهالشي بيخلي الناس تبعد عنو شوي وتصير علاقاتو غير مستقرة
7️⃣ إيذاء الذات ومحاولات انتحار
??: طيب شو الأسباب يادكتور؟
??⚕️: متل بقية الأمراض والاضطرابات النفسيّة بتبقى أسباب اضطراب الشخصية الحدية مو مفهومة بشكل كامل… بس ممكن يرتبط ب :
? العامل البيئي: يعني بيئة فيها ضغوطات أو تاريخ سوء معامل للشخص هو وصغير
? الأسباب الجينيّة: بعض الدراسات أشارت لأنو ممكن تكون اضطرابات الشخصية الحدية موروثة حتى أنو بتكتر بالعائلات يلي فيها أشخاص مكتئبين أو مدمنين
? تشوّهات الدماغ: مثلاً خلل ببعض النواقل العصبيّة يلي بتنظّم المزاج متل السيروتونين
ونحنا كمان لازم نميز بين اضطراب الشخصية الحدية وبين الفصام لأنو ممكن نخربط بيناتن بس نوب النفاس قصيرة وبينتقدا المريض
??: في علاج دكتور؟
??⚕️: هلا أهم شي منعملو نحنا هو علاج اسمو {{ العلاج النفسي السلوكي }}
يلي بيقوم فيه فريق كامل مختصّ ليساعد المريض يفهم مشكلتو ويتعامل معا بشكل صحيح وينمّي المهارات عندو ويخليه يتحكّم بمشاعرو أكتر وكيف يقدر يكوّن علاقات فعالة ومستقرّة وكيف يغيّر تصرفاتو الخطيرة ومحاولات إيذاء نفسو…
وفي حال حدثت نوبات نفاس قصيرة أو هياج وعدوانية فينا نعطي مضادات الاكتئاب ومضادات النفاس?
??:طيب دكتور يعني بنتي ممكن تشفى من هالمرض تماماً؟
??⚕️: هلا نحنا منطبق العلاج النفسي السلوكي بالبداية والأدوية يلي حكينا عنا في حال حتاجت… بس بيبقى العلاج (محدود) شوي لهيك كمان سموها اضطراب الشخصية (الحدية) .. والبعض ممكن يتطور لاكتئاب شديد في حال ماطلب المساعدة..
وبدي منكن تنتبهو عليها اكتر وماتخلوها لحالا بالبيت منشان ماتأذي حالا مرة تانية… وانشالله بتتحسّن بعد ماتجي ونبلش علاج…
??: شكراً كتير دكتور عذبتك معي كتير ❤️
??⚕️: أهلا وسهلا مدام.. هاد واجبي❤️
وهيك منكون حكينا اليوم عن واحدة من اضطرابات الشخصية الشائعة يلي كتار سمعنا انو عانو منها..
وانشالله كل أيامكم تضل حلوة وتضلوا بصحة وعافية❤️❤️
كنتُ مَعكم وفاء كنجو ?
المصادر:
مقرر الطب النفسي في كلية الطب البشري جامعة دمشق.
https://www.syr-res.com/article/21086.html
